HVB Kinderfemiliebal 2018

Op 3 fibberwarie waort in ein sfeervolle kantine ut jaorlikse kinderfemiliebal gehalde. Idderein stond d’r weer moeij verkleid op en waas klaor um d’r eine leuke aovend van te make. Ut oètroope van ut nieje prinselik duo stónd al vruùg op ut programma. Wae zoel dit jaor gaon regaere euver ut Bliëricks Handbalrièk?

Spraekstalmeister Bas vroog ut duo van veurig jaor, Milou en Zoë, op de bühn. Zeej mochte ein paar hints weggaeve.

Ut duo van 2018 is gewaore: Prins Bas I en Prinses Eefke I !!

Prins Bas (Eilering) is 12 jaor, speult beej de jónges D1 en zit op Den Hulster. Prinses Eefke (Koninkxs) is 11 jaor, speult beej de maedjes D2 en zit op de Springbeek. Ut handbalspelke én de vastelaovend is eur allebei met de paplaepel ingegaeve.

Eefke en Bas

Nao ut oètroope zónge Lisanne, Sanne en Marieke eur liedje “Scheet op” wao ze 4e mei ware gewaore op ut Liedjesmatinee.

Twieë waeke geleeje is prinses Eefke same met zién twieëlingzuske Floor  dansmerieke gewaore op de Poerkerplak. Ut jeugtrio van de Poerker prins Wout I met zien adjudanten Juup en Tom kwame same met de ganse raod van 11 én dansmerieke Floor ein kedootje bringe. Zeej bleve nog efkes gezellig in de kantine hosse en springe.

Ouk inkele jeugleeje hebbe opgetraoje:

  • de stoere F-jes ginge los op ut nummer “Vrouwkes”
  • de maedjes van de D2 sprónge op ut nummer “Springe nondeju”.
  • de dames B deeje ein denske op “de Macarena”

Netuurlijk kwaam ut jeuggezelschap van de Wortelepin met (ós jeuglid) prins Casey en prinses Sjuulke ós kersverse jeugduo fillecitere.
Ouk d’n Duikelaer van de Horsterwaeg (groeët- en jeuggezelschap) kwaam ein bezeuk bringe. HVB-jeuglid Julie v.d. Wielen is adjudante beej de jeug van d’n Duikelaer.

Weej meuge waal zegge det HVB hofleverancier van hoeëghede is, want ouk ut prinselik trio van ut groeëte gezelschap van de Wortelepin kump oèt ós vereiniging.
Prins Bart II met zién adjudanten Joep en Roel waorte dan ouk hertelik óntvange in ózze kantine. Ut gezelschap ging nog efkes de sporthal in, want hière 1 waas nog eure wedstrijd aan ut speule. Vors Carotius VIII Maurice woel waal ein belke goeije met Prins Bart II in de goal. Prins Bart woort efkes aafgeleid en de Vors zoog zién kans…snel smeet hae d’n bal taege ut netje.
In de kantine ging ut feesje door. Idderein ging ut duo fillecitere en kreeg ein moeije medalie.
D’r waas waal emus ein bietje teleurgesteld. Laura Holleman van dames 1 waas al 20 jaor aan ut wachte… En nog noeits gevraog… Met eine polonaise woort ut door prins Bas en prinses Eefke op de bühn gehaold. Eindelijk kwaam ziéne wins oèt, ut woort Prinses Laura I…
Nao ut officiële gedeilte waort d’r nog flink gedans en gesprónge op de bühn.
Ut feesje ging nog door tot in de kleine äörkes.

84aa1cbe-dd5c-4029-89d2-bff50d78238f 868b90e8-5d1f-4dcf-9722-5e290bc8f7fc 00939128-881b-4c13-b326-cd8b18b27f2a IMG_0944 IMG_0945 IMG_0946

 

Dit bericht is geplaatst in Foto's, Zoef!. Bookmark de permalink.

Reacties zijn gesloten.